Andaina – Concello de San Sadurniño 2026

Datos Básicos de interese

Data: 14 de xuño.

Lugar de saída e de chegada: Finca A Cortiña.
Hora de saída: 9:15h desde Igrexafeita.
Distancia: 12 Km
Idade: maiores de 10 anos
N.º de prazas: 50 (por orde de inscrición)
Prezo: Andaina 5 €. (18 € o xantar para participantes e acompañantes. Menores de 12 anos, xantar de balde).

Hai lugares nos que a paisaxe conta historias.

Nesta andaina, cada tramo do percorrido fala da relación entre a xeoloxía, a auga, a historia medieval e as lendas populares da nosa comarca.

Partiremos desde Igrexafeita para descender cara ao val do río Castro, un dos espazos naturais máis singulares do concello de San Sadurniño. Ao longo do percorrido poderemos observar formacións xeolóxicas de enorme interese, como o contacto entre os granitos e antigos sedimentos transformados en lousas, ademais das características pías formadas pola erosión fluvial ao longo de milleiros de anos.

A ruta levaranos ata o impresionante Castelo de Naraío, fortaleza medieval ligada á Casa dos Andrade e levantada sobre un promontorio rochoso que domina o val a máis de 400 metros de altitude. Declarado Ben de Interese Cultural, conserva aínda parte das súas murallas, a torre da homenaxe e antigos accesos abovedados, nun enclave que combina patrimonio, natureza e unha das imaxes máis espectaculares da comarca.

Desde o castelo ascenderemos cara ás Penas do Rei Mouro, un dos lugares máis fascinantes e simbólicos de San Sadurniño. Ademais da lenda popular que envolve este enclave, aquí atopamos un dos maiores conglomerados de seixo de Galiza, nunha paisaxe de grande personalidade que tamén é coñecida pola práctica da escalada.

Unha oportunidade para camiñar, descubrir e mirar con outros ollos lugares polos que moitas veces pasamos sen coñecer realmente o que agochan.